SIC sukcesige raportas: Televido

Paĝo ĉe ;
modifita en , far AMT.
Framojn forigu | remetu

Oficiala paĝaro de
Portugala Esperanto‑Asocio
www.esperanto.pt • portugala@esperanto.pt

✉ R. Dr. João Couto, 6 r/c A, PT‑1500‑239 LISBOA, Portugalio ✆ +351 ‑217 141 359

(Se tiu ĉi teksto estas videbla al vi, do aŭ via krozilo ne subtenas dHTML kaŭ CSS, aŭ tiuj funkcioj estis deŝaltitaj. Nenia problemo! Kvankam riĉa je grafika kaj reaga detalo se vizitata laŭ sia supozata konfiguro, tiu ĉi paĝaro estas planita tiel ke ĝian enhavon eblas konsulti eĉ en plej minimumaj medioj.)

Televido:
SIC sukcesige raportas

Miloj ekaŭdis pri ni: Dufoje kvar minutojn pri esperanto en la plej spektata portugalia TV‑a novaĵprogramo!

La 26‑an de oktobro elsendiĝis en portugalia televidkanalo SIC programero pri esperanto, kadre la du ĉefaj noticprogramoj. SIC estas neŝtata herca liberriceva kanalo, kutime la plej spektata en la lando, kaj tiu ĉi publikiĝo multe videbligis esperanton en Portugalio:

Spontana kontakto de ĵurnalistino Marisa Antunes venis septembre al Portugala Esperanto‑Asocio kaj la 16‑an de oktobro finfine okazis intervjuaro filmita dum du horoj en ties sidejo.

Estis intervjuitaj (laŭorde) A. Martins‑Tuválkin, Faria de Bastos, Hugo Lourenço kaj Werther Sacramento. Krome aperas mallonge Iuri Gaspar, Irina Tuvalkina, Marta T. Martins kaj Wílson Brígido — ĉi‑lastaj du en dialoga situacio.

La elsendo okazis kadre de Jornal da Tarde, tuttage en la samentreprena kabla kanalo SIC‑Notícias, kaj en la vespera Jornal da Noite — plenigante la kutiman “nenovaĵan” rubrikon de la SIC‑noticaroj. Krome okazis aludo al ĝi dum la matena Jornal das Dez.

Laŭplane la fina peco daŭrus 2'30 minutojn, sed «pro nekutima intereso» oni aprobis muntaĵon kun pli ol 4'00. Eĉ tiel restis netuŝita kroma temo, Pasporta Servo, al kiu la ĵurnalisto volis originale dediĉi duonon de la programero. Pro la neatendita “denseco” de nia afero, estis decidite prinotici Pasportan Servon en posta intervjuo, kiu profitos Kristnaskan hejmĉeeston de oftaj PS‑uzintoj el la portugaldevena esperantista “diasporo”.

Enestas en la elsendita peco iom da eraroj, kaj certe multo restis ne menciita (aŭ, fakte, formuntita), sed temas pri supermezure ĝusta, trafa kaj taŭga elsendaĵo.

Rezulte de ĝi venis al Portugala Esperanto‑Asocio tre multaj informpetoj, el kiuj rezultis eĉ kvin membriĝoj. La nombro de konataj eklernintoj ankaŭ kreskis, same kiel tiu de vizitantoj al nia paĝaro: 1489 en la unuaj 24 horoj, dum la kutimo estas ĉ. 30. Tiu nombro restis nekutime alta dum pluraj tagoj kaj kvin semajnojn poste ankoraŭ superis la antaŭan averaĝon.

Kelkaj kadroj